Innflutningur ólöglegs glæpalýðs og eiturlyfjasmyglara til Bandaríkjanna á galopnum landamærum Mexíkó er farinn að hafa veruleg áhrif á líf Bandaríkjamanna aðallega í stórborgunum. Joe Biden Bandaríkjaforseti liggur undir ásökunum um að vinna fyrir eiturlyfjahringi í Mexíkó, því hann notar ríkisvaldið til að banna landamæravörðum Texas að vinna störfin sín. Hér eru dæmi um mikla vakningu í Bandaríkjunum, að þeir verði sjálfir að fara að grípa í taumana. Til dæmis er ástandið í New York að fara úr böndunum, ólöglegir innflytjendur mynda glæpahópa, ráðast á og ræna vegfarendur, stela úr búðum og lemja á lögreglunni (sjá myndskeið frá New York að neðan). Hér er sagt frá afstöðu Kristi Noem, ríkisstjóra Suður-Dakóta, sem upplýsti þingmenn ríkisins um hvernig hægt er að aðstoða við lausn vandans á suðurlandamærum Bandaríkjanna.
Eftir að hafa heimsótt suðurlandamærin í síðustu viku, þá óskaði Noem eftir sameiginlegum fundi löggjafarþings Suður-Dakóta (sjá myndskeið að neðan).
Ekki áður lent í yfirtöku alríkisins á þjóðvarðliði einstakra ríkja til að ganga gegn ákvörðunum lýðræðislega kjörinnar stjórnar
Noem segir að ríkið geti sent starfsfólk, búnað og vistir t.d. gaddavír til Texas til aðstoðar við að tryggja suðurlandamærin. Þrátt fyrir dóm Hæstaréttar Bandaríkjanna sem leyfir alríkisyfirvöldum að fjarlægja vírinn sem settur var upp með fram landamærunum að Mexíkó. Ríkisstjóri Texas, Greg Abbot, hefur skírskotað til innrásarákvæðis og segir að Texas verði að bregðast við, þar sem alríkisstjórnin bregst skyldu sinni að hindra straum ólöglegs farandfólks.
Noem sagði, að S-Dakóta gæti sent hermenn til Texas ef óskað væri eftir slíkri aðstoð. Noem hefur þrisvar sent þjóðvarðlið Suður-Dakóta á vettvang sem hefur kostað ríkið um 2,2 milljónir dollara. Hún sagði í viðtali eftir ræðuna:
„Við erum á fordæmalausum tímum. Við höfum aldrei lent í því áður, að alríkisstjórnin tæki yfir stjórn á þjóðvarðliðinu og notaði það í öðrum tilgangi en við myndum gera.“
„Núna auðvelda hermennirnir við landamærin fólki að fara yfir landamærin. Þeir þurfa að geta stöðvað fólkið, sérstaklega það fólk sem vitað er um að er hættulegt og ekki leyfa þessum hættulegu glæpamönnum að koma inn í landið. Þeir þurfa að geta snúið þeim við.“
Innrásin á suðurlandamærunum breytir öllum ríkjum Bandaríkjanna í landamæraríki
Noem sagði í ræðu sinni, að fjöldi innflytjenda sem koma til landsins breyti öllum ríkjum Bandaríkjanna í landamæraríki:
„Bandaríkin eru á tímum innrásar – innrásin kemur gegnum suðurlandamærin. Ríkin 50 eiga sameiginlegan óvin – sá óvinur eru mexíkósku eiturlyfjahringirnir sem heyja stríð gegn þjóð okkar. Hryðjuverkasamtökin beita ofbeldi í sérhverju ríki okkar, jafnvel hér í Suður-Dakóta.“
Hér að neðan má sjá og hlýða á ræðu Kristi Noem, ríkisstjóra Suður-Dakóta. Þar fyrir neðan lýsir Curtis Sliwa á ástandinu í New York í viðtali við Fox News:
