Hinum linnulausa áróðri um heimsendi vegna ímyndaðrar loftslagsógnar hefur stöðugt verið haldið uppi til að hræða jarðarbúa, ekki síst börn og unglinga. Núna er samt eitthvað jákvætt að gerast, því sífellt fleiri unglingar snúa baki við „loftslagsógninni“ og telja að grænu mótmælin til að „bjarga heiminum“ sé bara truflandi. Æskan hefur önnur nærtækari vandamál að glíma við.
„Við höfum ekki tíma eða orku til að hafa áhyggjur af einhverri tilbúinni loftslagsógn, það eru aðrir mikilvægari hluti til að hafa áhyggjur af, eins og að verða ekki stunginn til bana í strætó á leiðinni heim.“
Ný skýrsla frá SOM stofnuninni í Svíþjóð sýnir að ungt fólk á aldrinum 16-29 ára hefur misst áhuga á umhverfis- og loftslagsmálum. Heil 11% segjast ekki hafa neinn áhuga á þessum málum.
Aðgerðarsinnar í loftslagsmálum úr tengslum við raunveruleikann
Tölurnar eru einnig staðfestar af Unglingavoginni (Ungdomsbarometern) sem sér nákvæmlega sömu þróun í sínum könnunum á aldurshópnum 15-24 ára. Jacob Borssén hjá Unglingavoginni segir við SVT:
„Árið 2018 höfðu átta prósent unglinga engan áhuga á umhverfis- og loftslagsmálum en árið 2023 voru þeir komnir upp í 14%.“
Margt ungt fólk telur að loftslagsaðgerðasinnar séu úr tengslum við raunveruleikann og trufli bara daglegt líf þeirra. Charlie Carlstedt, menntaskólanemi í Gautaborg segir:
„Loftslagsmótmælin eru bara truflandi. Ég spyr sjálfan mig, hvað í fjandanum eru þeir að gera?“
Mikill meirihluti Svía er orðinn þreyttur á aðgerðasinnunum sem meðal annars hafa valdið röskun í bílaumferðinni þannig að sjúkrabílar og slökkvilið hafa ekki komist leiðar sinnar.
Önnur mál mikilvægari fyrir unga fólkið
Æskufólk hefur þess í stað neyðst til að beina athyglinni að allt öðrum málum eins og glæpaklíkunum. Iza Wingård frá Gautaborg segir:
„Ég einbeiti mér mjög að því sem glæpahóparnir eru að gera og skotbardögunum og hvernig þetta hefur áhrif á okkur.“
Sams konar þróun sást í skólakosningunum þar sem Svíþjóðardemókratar fengu atkvæði fjórða hvers nemenda og urðu stærsti flokkurinn. Niðurstöðurnar sýna að ungir Svíar telja að málefni eins og öryggismál, glæpastarfsemi og innflytjendamál séu mikilvægari en loftslagsmál.
Unga fólkið í dag eru þjóðernissinnar morgundagsins
Tor-Björn Richthoff Änglasjö lítur mjög jákvætt á fréttirnar og telur að þetta sé algjörlega eðlileg þróun.
„Ungir Svíar munu í auknum mæli snúa sér að þjóðarhyggju. Við verðum að muna, að hið hræðilega samfélag sem hér hefur skapast er það samfélag sem ungir Svíar neyðast til að alast upp í. Ungt fólk hefur enga möguleika á að kaupa stórt hús í Djursholm, heldur neyðast til að upplifa verstu hliðar samfélagsins á hverjum degi alla daga. Þetta þýðir að unga fólkið í dag verða þjóðernissinnar morgundagsins.“
„Loftslagsógnin“ er fyrir forréttindahópana
„Þetta sást vel þegar 25% skólanemenda kusu Svíþjóðardemókrata. Það kemur líka á daginn að sífellt fleiri unglingar yfirgefa loftslagsmálin. Við höfum ekki tíma eða krafta til að hafa áhyggjur af einhverri tilbúinni loftslagsógn, það eru aðrir hlutir sem valda meiri áhyggjum, eins og að verða ekki stunginn til bana í strætó á leiðinni heim. Einungis börn forréttindastéttarinnar hafa efni á því að eyða tíma í hina ímynduðu loftslagsógn.“
