Kris Kobach, dómsmálaráðherra Kansas, höfðaði í vikunni mál gegn Pfizer. Í kæru dómsmálaráðherrans segir að „Pfizer hafi villt um fyrir almenningi að fyrirtækið væri með öruggt og árangursríkt Covid-19 bóluefni.“ Einnig er því haldið fram að Pfizer hafi brotið gegn neytendaverndarlögum ríkisins.
Kobach segir:
„Pfizer kom með margar villandi yfirlýsingar til að blekkja almenning um bóluefni sitt á þeim tíma, þegar Bandaríkjamenn þurftu að heyra sannleikann.“
10% barnshafandi kvenna fengu fósturlát
Í kærunni er því haldið fram, að lyfjafyrirtækið hafi viljandi leynt, þagað yfir og sleppt efnislegum staðreyndum um Covid-19 bóluefnið. Eitt af því alvarlegasta var að Covid-bóluefnið var sagt öruggt fyrir barnshafandi konur. Dómsmálaráðherrann segir:
„Pfizer markaðssetti bóluefnið sitt sem öruggt fyrir barnshafandi konur. Í febrúar 2021 höfðu 458 þungaðar konur verið bólusettar með Pfizer Covid-19 bóluefni. Meira en helmingur þeirra tilkynnti um aukaverkanir og meira en 10% tilkynntu um fósturlát.“
Pfizer sagði bóluefnið öruggt varðandi hjartavöðvabólgu gegn betri vitund
Jafnframt bendir dómsmálaráðherra á þá staðreynd, að Pfizer markaðssetti Covid-bóluefnið sem öruggt varðandi hjartavöðvabólgu og gollurshússbólgu. Þar vísar hann meðal annars til þess, að Albert Boula, forstjóri Pfizer, sagði í janúar á síðasta ári: „Við höfum ekki séð eitt einasta dæmi um hjartavöðvabólgu, þó að við höfum dreift milljörðum skammta.“ Kobach segir:
„En Pfizer vissi, að bandarísk stjórnvöld og ráðamenn bandaríska hersins ásamt fleirum höfðu komist að því, að Covid-19 bóluefni Pfizer olli hjartavöðvabólgu og gollurshússbólgu.“
Rannsökuðu aldrei smit eftir bólusetningu
Pfizer markaðssetti einnig Covid-bóluefnið sem virkt gegn öllum afbrigðum Covid og að bóluefnið myndi stöðva útbreiðslu sýkingar. Kobach segir enn fremur:
„Pfizer hvatti Bandaríkjamenn til að láta bólusetja sig til að vernda ástvini sína, sem gefur greinilega til kynna að bólusetning Pfizers Covid-19 hafi stöðvað smit. Pfizer viðurkenndi síðar, að þeir hefðu aldrei rannsakað smit eftir að viðtakendur voru bólusettir.“
Texas hefur þegar kært Pfizer og fimm önnur ríki tilbúin með kærur
Pfizer segir í yfirlýsingu, að Covid-19 bóluefni hafi bjargað óteljandi mannslífum og að fullyrðingar fyrirtækisins um Covid bóluefnið væru nákvæmar og byggðar á vísindum:
„Fyrirtækið telur að mál ríkisins eigi ekki við rök að styðjast og mun bregðast við kærunni á viðeigandi hátt.“
Texas höfðaði einnig mál gegn Pfizer í lok síðasta árs. Kobach segir að fimm önnur ríki séu einnig tilbúin að kæra fyrirtækið.
