Vaxandi ofbeldisástand ríkir í sænskum fangelsum sem öll eru yfirfull. Dæmdir glæpamenn ganga lausir á „biðlista“ eftir að komast inn í fangelsin. Verkalýðsfélagið Seko segir að komið sé að þolmörkum.
Christer Hallqvist, formaður Seko, segir í viðtali við sænska sjónvarpið SVT:
„Við erum að missa stjórnina. Fangarnir taka meira og minna völdin yfir deildunum. Starfsfólkið forðar sér undan í stað þess að vera nálægt föngunum og enginn tími er til að afstýra atvikum. Þetta mun enda með ósköpum.“
Árið 2023 var tilkynnt um yfir 3.600 tilvik hótana og ofbeldis milli fanga og starfsfólks í fangelsum og stofnunum sem var greinileg aukning frá fyrra ári. Talið er að þrengslin séu einn þáttur í þessari þróun. Gunnar Strömmer, dómsmálaráðherra Svíþjóðar, viðurkennir að ástandið á fangelsunum sé „undir miklu álagi.“ Hann bendir á að fangelsi hafi ekki verið byggð í langan tíma en núna eru teikningar nýrra fangelsa á borðinu.
Ofbeldi og hótanir í sænskum fangelsum
Á milli fanga
2021: 1.242 atvik
2022: 1.198
2023: 1.333
Gegn starfsfólki
2021: 1.744 atvik
2022: 1.962
2023: 2.354
