Dökku skýin hrannast upp á himininn. Hæst ber Úkraínustríðið og átökin fyrir botni Miðjarðarhafs. Ingimundur Bergmann, fv. kjúklingabóndi og vélfræðingur í Flóanum, hefur eins og margir aðrir áhyggjur af stöðu mála. Hann er virkur í þjóðfélagsumræðunni með eigið blogg og á samfélagsmiðlum.
Í samtalinu fer Ingimundur yfir ástandið í Úkraínu en hann þekkir fólk frá austurhluta Úkraínu sem í dag er rússneskt land samkvæmt skilgreiningu Rússlands. Fjölmiðlar á Vesturlöndum hafa þaggað niður mannskæðar árásir Úkraínustjórnar gegn rússneskumælandi íbúum í austurhluta Úkraínu. Krafa Vesturlanda um að Rússland gefi eftir þessi svæði eins og Krímskagann segir Ingimundur vera óraunhæfan kost. Rússar munu aldrei láta Krímskagann af hendi.
Fólki á Vesturlöndum sagt að trúa að Pútín muni ráðast á og taka alla Evrópu ef Úkraína „tapar“ stríðinu
Ingimundur Bergmann segir það Rússagrýlu að halda því fram „að Pútín ráðist á Svíþjóð og Finnland“ en þannig hljómar boðskapur yfirvalda þessara ríkja. Yfir stendur Nató-æfing 90.000 hermanna m.a. í Svíþjóð en Finnland er nýr aðili að Nató og Svíþjóð í dyragættinni. Bæði Norðurlöndin hafa gert samning við Bandaríkin sem veitir þeim fullan aðgang að herstöðvum landanna. Bandarískur herforingi samhæfir heri Nató-ríkja og markið er sett á Rússland. Rússar hafa boðað, að ef Nató komi upp vopnum við landamæri Rússlands í Finnlandi munu þeir neyðast til að bregðast við með vopna- og hersöfnun til varnar sínum megin við landamærin.
Vesturlönd eru í tímakapphlaupi við að breyta framleiðslunni yfir í hergagnaframleiðslu til að dæla enn meira af vopnum inn í Úkraínu. Samtímis eykst andúð almennings á stríðinu. Ástandið í stjórnmálum með elliæra menn í fararbroddi bætir ekki úr ástandinu og friðarumleitanir á hverfandi hveli. Ingimundur segir einu færu leiðina að friða vera með samningum í stað mannsslátrunar en viljann virðist skorta á Vesturlöndum.
Öngþveiti í innflytjendamálum á Íslandi – sænska leiðin innflutt athugasemdalaust – Íslandi býr hætta af glæpahópum
Málið barst einnig að öngþveiti í hælisleitendamálum og hömlulausum innflutningi fólks til Íslands. Tjaldbúðir fyrir framan Alþingi hafa skapað neikvæða ímynd. Ingimundur tók skýrt fram að hann hefði ekkert á móti útlendingum en hins vegar verða málin að vera tekin föstum tökum en ekki með lauslæti landamæralauss Íslands. „Hvernig stendur á því, að það er ekki hægt að verja landamæri eyþjóðar úti í Atlantshafi?“ spyr Ingimundur réttilega og vísar til annarra landa með margvíslega stærri og erfiðari landamæri. Það sem gerir málið einnig erfiðara, er hversu viðkvæmt það er til umræðu í samfélaginu en sumir eru fljótfærir á uppnefningaryrðin „rasisti“ og „samsæriskenningarsmiður.“ Nýlegt dæmi er árásardæmið á Fjölbrautaskóla Breiðholts í vikunni en þar var skólastofum lokað og nemendum skipað að leggja sig á gólfið vegna hugsanlegrar vopnaðrar árásar. Sem betur fer tókst að afstýra slysi í þetta sinn en hvað með það næsta?
Smelltu á spilarann hér að neðan til að hlusta á umræðurnar:
