9. þáttur Heimsmálanna var tekinn upp 9. febrúar með þeim Margréti Friðriksdóttur, Fréttin.is og Gústafi Skúlasyni. Mál málanna var hið umtalaða viðtal Tucker Carlson við Vladimir Pútín forseta Rússlands í vikunni. Glóbalistarnir, vopnasalarnir, stríðsæsingamennirnir fordæmdu viðtalið fyrirfram um leið og Tucker Carlson tilkynnti, að hann ætlaði að ræða við Pútín. Pútín hinn hættulegi getur nefnilega haft áhrif á „fávísan lýðinn“ í hreiðrum glóbalistanna.
Eftirvæntingin var því mikil og áhorf sömuleiðis, því á tíu fyrstu klukkutímunum höfðu 77 milljónir bæði heyrt og séð það sem Pútín hafði að segja. Kannski urðu einhverjir fyrir vonbrigðum. Hinn hræðilegi talaði nefnilega um frið. Hann vill ekki stríð. En óvinurinn hefur líkt og Hamas skrifað bann við friðarsamningum í æðstu lög landsins.
Tucker hafði fjarvistarsönnun en ekki CIA
Viðtal Tucker Carlson var tveggja tíma langt. Á þeim tíma er bæði hægt að spyrja óþægilegra spurninga og kafa ofan í málin. Tucker Carlson er afbragðs blaðamaður sem varðveitir heiður stéttarinnar betur en margir læknar Hippokratesareiðinn. Hann var hispurslaus og þurfti Pútín að hafa fyrir sumum svörunum. Hann kom því smá hefndum að, þegar hann sagði sem svar við spurningunni „Hverjir sprengdu Nord Stream?“: „Það voruð þið sem gerðuð það.“ Þið voruð Bandaríkjamenn og Tucker varði sig: „Ég gerði það ekki, ég sprengdi ekki gasleiðslurnar.“ „Þú hafðir fjarvistasönnun en CIA ekki“ svaraði þá Pútín og bætti við „Guði sé lof að þeir vildu þig ekki hjá CIA.“ Þetta svar var sönnun til Tuckers og Bandaríkjanna, að leyniþjónusta Rússlands er í góðum höndum og allt virkar eins og það á að gera. Slíkt hið sama er ekki hægt að segja um bandarískar slíkar, sem meira njósna um innlenda en erlenda í þeim darraðadansi sem minnislaus húsbóndi Hvíta hússins hefur dregið þjóðina sem alþjóð í.
Úkraína er harmleikur
Pútín lýsti sögu og aðdraganda Úkraínustríðsins og minnti á Istanbúlsamkomulagið sem búið var að undirrita að mestu leyti af fulltrúa úkraínsku sendinefndarinnar. Þegar sá kom heim til Kænugarðar hafði Boris nokkur Johnson orðið fyrri til og tekist að sannfæra húsbóndann um hvaða stefna gilti fyrir Úkraínu: „Banna allar samningaviðræður!“ Síðan hafa hundruð þúsunda saklausra lífa verið slátrað. Eins og Tucker Carlson orðaði það: „Úkraína er harmleikur.“
Mörg önnur mál voru til umræðu eins og uppreisn bænda í Evrópu, ríkismyndun ESB sem er að verða ófrýnilegt 4. ríki, þar sem ritskoðun gildir og hlýðni við glóbalistana. Það er búið að hertaka Sameinuðu þjóðirnar og Alþjóðaheilbrigðismálastofnunina. Stjórnmálamenn á Vesturlöndum eru margir hverjir keyptir. Lítið á þá konu sem er á launaskrá íslenskra skattgreiðenda í embætti forsætisráðherra og vinnur að því selja inn fullveldisafnám Alþjóðaheilbrigðismálastofnunarinnar á Íslandi og í Evrópu. Spillingin er orðin svo sjúk, réttlætið svo niður troðið, fjallkonan í hlekkjum, almenningur sífellt fátækari svo er peningum eytt í innflytjendur frá svæðum Hamas sem áttu að fara í skattgreiðendur sem hafa misst heimili sín í náttúruhamförum. Vitleysisveirurnar ríða ekki við einteyming.
Smelltu á spilarann hér að neðan til að hlusta á þáttinn:
